Сэтинньи 8 күнүгэр Дүпсүҥҥэ “Дүөндү” сынньалаҥ киинигэр норуот сомоҕолоһуутун күнүгэр дойдубут үрдүнэн сатыылаабыт анал байыаннай дьайыыга сылдьар эрэллээх эр дьоннорбутугар, уолаттарбытыгар анааммыт «Бары бииргэ-биир сомоҕо» аһымал акция концерт, атыы — эргиэн дьаарбаҥка, барыта сүүйүүлээх оонньуу буолан ааста. Бу күн ыалдьыттарга анаан дэлэй астаах дьаарбаҥка үлэлээтэ. Айылҕабыт күндү бэлэхтэрэ, төрөппүттэрбит, оҕолорбут, тэрилтэлэрбит астаабыт минньигэс бүлүүдэлэрэ олохтоохтору үөртэ. Аралдьытар аукцион дьону-сэргэни сэҥээртэ. Аукциоҥҥа Баай Байанай бэлэхтэрэ, кыһыҥҥы идэһэ мааны аһа-үөлэ оонньоннулар. Бу киэһэ сыананы киэргэттилэр уһуйааннарбыт, оскуолабыт оҕолоро, тэрилтэлэрбит үлэһиттэрэ, түмсүүлэрбит, нэһилиэкпит олохтоохторо. Аахсыйа түмүгүнэн уопсайа 91.850 солкуобай киирдэ.
Дойдуларыттан ыраах, ууну-уоту ортотунан сылдьар уолаттарбытыгар күүс-көмө буолар Айыы санаалаах дьоммутугар махтал тиэрдэбит. Биир киһи курдук сомоҕолоһон, сомоҕолоһуу күнүнэн уолаттарбыт бары этэҥҥэ кэллиннэр диэн көмөнү тэрийиигэ көхтөөхтүк үлэлиир “Уран тарбахтар”, “Туллук — эйэ уонна үтүө санаа бэлиэтэ”, “Дүпсүн эһигинниин бииргэ” нэһилиэкпит волонтердарын түмсүүлэригэр, тэрилтэлэрбит коллективтарыгар, оскуолабыт оҕолоругар, нэһилиэкпит олохтоохторугар, кэккэлэһэ сытар Бээдибит олохтоохторугар махталбытын тиэрдэбит.
Кыайыы кынаттаах, ситиһии сиэттиһиилээх хорсун хоһууннарбыт төрөөбүт дойдуларыгар этэҥҥэ эргиллэн кэлэллэригэр бука бары эрэнэбит, күүтэбит. Бар дьоммут, инникигэ эрэллээх, чөл туруктаах, доруобай, дьоллоох эрэ буолун!
